Սույն թվականի օգոստոսի 2-6 Վրաստանի Իկալտո բնակավայրում անցկացվեց Ամառային ակադեմիա «Պատմության մրցույթներ 3,0» ծրագրի մասնակից ուսուցիչների համար։ Ակադեմիային ներկա էին պատմության 18 ուսուցիչներ Հայաստանից, Վրաստանից և Մոլդովայից։ Ուկրաինայի թիմը, պատերազմական իրավիճակով պայմանավորված, ցավոք, չկարողացավ ժամանել Վրաստան և մասնակցել երկար սպասված այս հանդիպմանը։
Ակադեմիայի ընթացքում ուսուցիչները հնարավորություն ունեցան կիսվելու իրենց փորձով, խոսեցին նախագծային հետազոտական աշխատանք կատարելու հնարավորությունների և դժվարությունների մասին, քննարկեցին խոչընդոտներն ու դրանց լուծումները, ինչպես նաև ներկայացրեցին պատմության դասավանդման իրենց պրակտիկան, կիրառած մեթոդներն ու ռազմավարությունները։
![](https://dvvprev.hazarashen.am/wp-content/uploads/2022/08/IMG_2579-scaled.jpg)
Հայաստանի թիմի քննարկումը Ամառային ակադեմիայի ժամանակ
Ակադեմիայի հրավիրյալ բանախոսները ներկայացրեցինք նոր մոտեցումներ և մեթոդներ պատմություն առարկան արդյունավետ կերպով դասավանդելու համար, մասնավորպես՝ Էլենե Մեձմարիաշվիլին խոսեց դպրոցում ռեպրեսիաների և տրավմատիկ անցյալի մասին դասավանդելու մոտեցումների մասին, իսկ Գայանե Շագոյանը ներկայացրեց «հիշողության լանդշաֆտը» որպես պատմության դասավանդման կոնցեպտ և գործիք կիրառելու մասին։ Վրաստանի «Սովլաբ» կազմակերպության ներկայացուցիչ Ռուսուդան Կոբախիձեն ներկայացրեց կազմակերպության իրականացրած հետազոտությունները և հրապարակած գրականությունը, որը կարող է Խորհրդային ժամանակաշրջանի դասավանդման համար օգտակար ռեսուրս հանդիսանալ ուսուցիչների համար։
![](https://dvvprev.hazarashen.am/wp-content/uploads/2022/08/IMG_2444-scaled.jpg)
Էլենե Մեձմարիաշվիլի
![](https://dvvprev.hazarashen.am/wp-content/uploads/2022/08/IMG_3124-scaled.jpg)
Գայանե Շագոյան
![](https://dvvprev.hazarashen.am/wp-content/uploads/2022/08/IMG_2935-1024x683.jpg)
Ռուսուդան Կոբախիձե
Մասնակցիները նաև փոխանակեցին մտքեր ծրագրի շարունակության, հնարավոր թեմաների և առաջարկվող փոփոխությունների մասին։
Միջոցառումը թույլ տվեցին ծրագրի մասնակից լավագույն ուսուցիչներին հանդիպելու և միասին ամփոփելու ծրագրի ընթացքում իրենց ձեռքբերումներն ու գրանցած հաջողությունները, ինչպես նաև խնդիրները՝ հույս հայտնելով հետագա տարիներին ևս նման հանդիպումների մասնակցության։